HATAW! D'yaryo ng Bayan hatawtabloid.com
NAIPAMAHAGI ng lokal na pamahalaan ng Caloocan ngayong Linggo ang P500 cash allowance para sa mahigit 6,000 estudyante sa Barangay Deparo, ng nasabing lungsod.
Nasa 270,000 ang kabuuang bilang ng mga estudyanteng naka-enrol sa mga pampublikong elementary at high school sa lungsod, na target bigyan ng allowance ng Caloocan local government.
Napuno ngayong araw ng Linggo ang covered court ng Barangay Deparo ng mga magulang ng mga estudyante para makuha ang cash allowace ng kanilang mga anak.
Para sa mga magulang, malaking tulong ang pinansiyal na ayudang natanggap para sa mga anak.
“Malaking tulong po kasi sa mga gastusin, pambili ng pagkain nila, pandagdag po,” anang magulang.
Nasa P2,000 ang dapat na matatanggap ni Lina Salting, na may 4 na anak na nag-aaral sa lungsod.
Makatutulong daw iyon pambili ng mga pangangailangan ng mga anak lalo at nawalan ng trabaho ang kaniyang mister, isang cellphone technician, mula nang isailalim sa lockdown ang Luzon.
“Tipid-tipid lang din po lalo na po sa pang-araw-araw na pangangailangan ng mga bata… napakahirap po ngayon lalo na kasi ‘yong mga bata, wala sila makain, ‘yun nga ‘yong problema po,” ani Salting.
Katuwang ng lokal na pamahalaan ang Universal Storefront Services Corporation para matiyak na organisado ang pamamahagi ng cash allowance ng mga estudyante, ayon kay Mayor Oscar Malapitan.
“Sila ang nagdi-distribute. May mga retrato pa ‘yon ‘pag ‘yong magulang kinuha ‘yong pera, mayroon signature, mayroon retrato. Kaya hindi made-deny, walang dahilan para sabihin hindi kami nakakuha,” ani Malapitan.
Para maayos ang pamamahagi, bawat paaralan sa lungsod ang nagsumite ng listahan ng mga estudyante, na inilagay sa database, ayon kay Malapitan.
Makatatanggap umano ng text message ang mga magulang ng estudyante kaugnay ng petsa, oras at venue ng pagkuha ng cash aid.
Ayon kay Malapitan, pinakikiramdaman pa niya kung kailangan palawigin pa ang enhanced community quarantine sa lungsod, na nakatakdang matapos sa 15 Mayo.
“Kung kailangan i-extend, mag-extend… Sa amin, every day, dumadagdag ‘yong nagpo-positive. Pinakikiramdaman ko, gaya ng IATF,” ani Malapitan, na tinutukoy ang Inter-Agency Task Force on Emerging Infectious Disease.
Noong Sabado, nakapagtala ang Caloocan ng 204 COVID-19 cases, ayon kay Malapitan. (ROMMEL SALES)
