HATAW! D'yaryo ng Bayan hatawtabloid.com
INIIPON ng Department of the Interior and Local Government (DILG) ang dossier ng bawat barangay kapitan sa 42,000 barangays sa buong bansa para panagutin ang sinomang may katiwalian kaugnay sa implementasyon ng Social Amelioration Program (SAP) ng pamahalaan.
Ang dossier ay koleksiyon ng mga datos at dokumento na nagsasaad ng mga impormasyon hinggil sa isang tao, pangyayari o isyu at karaniwang ginagamit ng intelligence community sa mga tinitiktikang personalidad.
Bukod sa naging Armed Forces of the Philippines (AFP) chief of staff, si DILG Secretary Eduardo Año ay isang batikang intelligence officer.
Ayon kay Año, marami nang nakalap na impormasyon ang DILG na may mga opisyal ng barangay na binibigyan ng pinansiyal na ayuda mula sa SAP ang mga hindi karapat-dapat makatanggap.
Tumanggi siyang tukuyin ang lugar ng mga nasabing barangay officials pero tiniyak niya pananagutin sila matapos ang enhanced community quarantine (ECQ).
“Marami na kaming nakuhang mga reports about barangay officials na ang binibigyan ay hindi naman talaga karapat-dapat, lahat iyan ay gina-gather na natin. Hindi muna ako magpapangalan ng mga lugar pero sa ngayon kasi ay tuloy-tuloy pa, pero hahabulin natin lahat ng mga magkakaroon ng katiwalian,” sabi niya.
Batay sa ipinatutupad na SAP ng Department of Social Welfare and Development (DSWD) , makatatanggap ng mula P5,000 hanggang P8,000 kada buwan sa loob ng dalawang buwan ang bawat pamilyang nasa informal sector habang umiiral ang enhanced community quarantine sa kanilang lugar.
Ang lokal na pamahalaan aniya ang mamamahala sa pamamahagi ng ayudang pinansiyal pero obligado ang bawat barangay na ipaskil ang listahan ng mga nakatanggap at makikita rin sa website ng DSWD ang listahang isinumite nila alinsunod sa isinusulong na transparency ng gobyerno.
Kaugnay nito, hinimok ni DSWD Secretary Rolando Bautista ang publiko na guwardiyahan ang pera ng bayan upang hindi mapunta sa maling mga kamay.
“Ngayon, sabihin natin na mayroon tayong nakikitang mga irregularities or anomalies, kaya po ini-encourage po namin talaga lahat ng sambayanan na sumama sila at maging guwardiya para ma-ensure na talagang iyong dapat na makatanggap ng ayuda ay nakatatanggap.,” aniya.
Pinalawig aniya ang deadline sa lokal na pamahalaan para ipamigay ang first tranche ng SAP hanggang 7 Mayo at bago sila makatanggap ng second tranche ay kailangan nilang magsumite ng liquidation report na beberipikahin ng DSWD.
Nasa kamay aniya ng mga lokal na opisyal ang bilis at kawastohan ng pamamahagi ng ayudang pinansiyal at wala sa DSWD. (ROSE NOVENARIO)
