Habang nasa motorsiklo… Pulis-Maynila inatake sa puso

BINAWIAN ng buhay sa ospital ang isang pulis-Maynila makaraang atakehin sa puso habang lulan ng kanyang motor­siklo papasok sa trabaho sa Tondo, Maynila kama­kalawa ng umaga.

Ayon sa ulat ng Manila Police District (MPD), kinilala ang biktimang si P/Lt. Raul Imperial na papunta sa MPD Police Station 5 nang atakehin habang sakay ng kanyang motor­siklo sa Chesa St., Tondo dakong 5:30 am.

Isang concerned citizen ang nakakita kay Imperial nang bumag­sak sa kalsada.

Mabilis na naisugod ng concerned citizen si Imperial sa Manila Johnston Hospital pero hindi naisalba ang kan­yang buhay.

Nabatid sa mga kasa­mahan at kaibigan ng pulis, bago pa lamang nata­tanggaap ang kan­yang promosyon bilang tenyente nang atakehin sa puso.

(BRIAN BILASANO)