Sa sobrang gigil… Kumare siniil ng halik sa labi ng truck driver

SINIIL ng halik ng 29-anyos truck driver ang kanyang kumare nang magkasalubong sila sa loob ng kanilang tiniti­rahang compound sa Valenzuela City kama­kalawa ng gabi.

Nahaharap sa ka­song acts of lasci­viousness ang suspek na kinilalang si Jesus Laguinday, residente sa Francisco Compound, Brgy. Karuhatan na isinampa ng Valenzuela Police Women and Chil­dren’s Protection Desk (WCPD)  sa piskalya ng lungsod.

Namula ang mukha sa hiya at galit ng 30-anyos ginang na kinila­lang si alyas Armie lalo na’t hindi niya inakala na hahalikan siya sa labi ng kumpare at malapit na kaibigan ng kanilang pamilya.

Sa ulat kay Valen­zuela police chief P/Col. Carlito Gaces, nabatid na matagal na umanong may  gusto si Laguinday sa ginang pero hindi niya magawang mai­pag­tapat ang nararam­daman dahil bukod sa may live-in partner ang biktima, matalik na magkaibigan ang kanilang pamilya.

Gayonman, hindi na nakatiis sa panggigil si Laguinday nang masa­lu­bong niya dakong  9:30 pm si Armie sa loob ng compound kaya’t matapos akbayan ang ginang ay biglang siniil ng halik ang labi.

Binitiwan ng lalaki ang pagkakayakap at paghalik sa biktima nang magsisigaw at humingi ng tulong sa kanyang mga kaanak.

Kaagad nilang inilapit sa mga barangay tanod ang kabastusang ginawa ng suspek na nagresulta sa kanyang pagkakadakip.

(ROMMEL SALES)