Wanted person nakipagbarilan sa parak tigbak

PATAY ang  isang lalaking wanted sa Valenzuela City matapos makipagbarilan sa mga pulis na nagsisilbi ng arrest warrant laban sa kanya sa Caloocan City, kamakalawa ng gabi.

Kinilala ni Valenzuela police chief P/Col. Carlito Gaces ang suspek na si Dominic Batin, ng Don Simeon St., Mapulang Lupa na hindi umabot nang buhay sa Valenzuela City Medical Center (VCMC) sanhi ng tama ng bala sa katawan.

Ayon kay Station Inves­tigation Unit (SIU) chief P/Capt. Albert Juanillo Jr., dakong 6:30 pm, tinungo ng Valenzuela Warrant and Subpoena Section (WSS) team, sa koordinasyon ng PCP-6 sa Brgy. 167, Llano, Caloocan City para arestohin ang suspek.

Dala ang dokumento, isinilbi ng pulisya kay Batin ang warrant of arrest dahil sa paglabag sa Comprehensive Firearms and Ammunition Regulation Act, at Omnibus Election Code na inisyu ng RTC Branch 285, Valenzuela City noong 24 Hunyo 2019.

Gayonman, nang aarestohin na nina P/SMSgt. Roberto Santillan at P/Cpl. Maverick Jake Perez, dalawang beses umanong binaril ni Batin ang mga pulis ngunit hindi pumutok ang armas.

Sa pangamba sa kanilang buhay, napilitang paputukan ng mga pulis ang suspek at nang masapol sa katawan ay itinakbo sa pagamutan.

Napag-lamang ilang taon na ang nakalilipas, nasangkot din sa ilegal na droga si Batin.

(ROMMEL SALES)