Babaeng sex worker inatado ng saksak sa loob ng motel

DUGUAN at tadtad ng saksak ang isang babae nang matagpuan sa inupahang motel, Linggo ng madaling araw sa Tondo, Maynila.

Tinangkang habulin ang suspek na nagtata­takbo palabas ng Safety Motel sa kanto ng Morio­nes at Mabuhay St., ngu­nit hindi naabutan ng roomboy.

Inilarawan  ni P/Sgt. Jansen Rey San Pedro, ng Manila Police District – Homicide Section, ang biktima na kinilala sa alyas na Aissa, edad 25-30, at katamtaman ang pangangatawan.

Sa ulat, 5:30 am nang madiskubreng walang malay ang duguang biktima.

Bago nadiskubre ang biktima, nakita umano ang isang lalaki na tuma­takbo papatakas galing sa isang kuwarto ng motel.

Nabatid na hinabol ni Daniel Reantaso ang  tumatakas na suspek, pero hindi inabutan, kaya agad nitong pinuntahan ang babae at nakitang naliligo sa sariling dugo ang babae dahil sa mga saksak sa iba’t ibang bahagi ng katawan.

Sa impormasyon ng pulisya, kilala umanong bayarang babae ang biktima sa lugar.

Inaalam ng pulisya kung hindi pagkaka­unawaan sa presyo ng ‘panandaliang kaliga­yahan’ ang pinag-awa­yan ng biktima at ng suspek.

Iniimbestigahan din ng pulisya ang ibang motibo at inaalam ang pagkakilanlan ng suspek.