Estudyante hinablutan ng bag sa jeepney snatcher arestado

SA kulungan bumagsak ang isang 27-anyos lalaki nang daklutin ang bag ng isang coed na naipit sa traffic habang sakay ng pampa­saherong jeep sa Navotas City.

Kinilala ni Navotas police chief P/Col. Rolando Balasabas ang suspek na si Joshua Mahinay, ng Tondo, Maynila, kakasuhan ng robbery snatching.

Batay sa ulat, dakong 11:00 am, sakay ng pampasaherong jeep ang biktimang si Hazel Reyes, 18 anyos, nang maipit sa trapik ang sinasakyan sa C3 Road, Barangay North Bay Boulevard South (NBBS).

Inakyat ni Mahinay ang nakahintong jeep at dinaklot ang bag na kalong-kalong ni Reyes ngunit minalas na may pulis malapit sa insidente kaya agad nakahingi ng tulong ang biktima at nadakip ang suspek.

Nabawi kay Mahinay ang bag ng biktima na naglalaman ng isang laptop na nagkakahalaga ng P15,000 at isang cellphone na nagkakahalaga ng P7,000. (ROMMEL SALES)