17-anyos obrero kritikal sa saksak

KRITIKAL ang kalagayan sa pagamutan ng isang 17-anyos obrero matapos saksakin ng kapitbahay makaraang tangkaing ipaghiganti ang kanyang kaibigan na unang binugbog ng suspek sa Malabon City, kamakalawa ng gabi.

Patuloy na ginagamot sa Tondo Medical Center (TMC) ang biktimang kinilalang si Michael Salcedo, ng Sitio 6 Dumpsite, Brgy. Catmon, sanhi ng mga saksak sa katawan habang pinaghahanap ng mga pulis ang suspek na si Christian Lauron, 22.

Sa nakarating na ulat kay Malabon police chief P/Col. Jessie Tamayao, unang binugbog ng suspek ang malapit na kaibigan ng biktima na si  alayas Biboy sa hindi malamang dahilan.

Dakong 11:25 pm, nang malaman ni Salcedo ang insidente kaya humingi siya ng tulong sa kanyang kuya at kasama si Biboy ay sinugod ang suspek sa bahay.

Gayonman, nang mapansin ni Lauron na susugurin siya ng tatlo ay kumuha ng patalim at inunahang ng pagsaksak sa katawan si Salcedo habang si Biboy at kapatid ng biktima ay pinagtulungan bugbugin ang suspek na nagawang makatakas. (ROMMEL SALES)