HATAW! D'yaryo ng Bayan hatawtabloid.com
PARANG ‘nagpapataasan ng ihi’ ang dalawa sa mga tatakbo bilang Speaker of the House kung ang napapabalitang suhulan at bilihan ng boto ang pag-uusapan.
Mantakin naman ninyo, nagpapirma ng isang manifesto of support si congressman 1 mula sa kabisayaan kapalit ng tumataginting na P500,000 bawat kongresista kahit walang commitment o gustong magpalit kung sino ang iboboto bilang speaker?
Aba’y hindi naman nagpahuli si congressman 2 na sinasabing malapit sa isa sa mga anak ng pangulo at agad na nag-alok ng mas tumataginting na ‘isang mansanans’ o P1 milyon bawat kongresista sa kondisyong siya ang iboboto at nangako pa umanong walang kongresista na hindi mabibigyan ng pondo kahit kalaban pa ng administrasyon.
Akala natin happy na? Siyempre hindi pa rin. Nagpahabol daw si congressman 1 ng padagdag sa kanyang unang bigay na P500,000.
Gagawin niyang ‘dalawang mansanas’ o P2 milyon ang ibibigay bawat kongresista na siguradong boboto sa kanya. Kumbaga, kailangan isangla ng mga kongresista ang kanilang dangal at kaluluwa para makatanggap ng dalawang milyong piso ang bawat isa sa kanila.
Ano na ba talaga ang nangyayari sa Kamara? Bakit tila pera-pera na lang ang lumulutang na usapan sa labanan ng speakership?
Ang tanong, saang balong malalim kinukuha ng dalawang kongresista ang pondong ipamimili nila ng boto? Galing ba ito sa mayayamang negosyante na sumusuporta sa kanila o mula sa mga tagong yaman na unti-unti nang nakakalkal upang maging realidad ang kanilang ambisyong maging speaker na kanilang puhunan sa pagtakbo bilang senador sa 2022?
Nakapangingilabot ang ganitong mga eksena. Hindi ba puwedeng daanin sa kakayahan, galing at liderato ng isang kongresista ang pagiging speaker ng Kamara?
Panawagan sa mga kongresista, huwag ninyong hayaang mapunta sa highest bidder ang liderato ng kamara.
Pumili nang tama!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
