Coco, Yassi todo hataw para sa AP-PL, “Probinsyano” dinumog sa Ormoc

NON-STOP at lalo pang itinotodo ng aktor na si Coco Martin at leading lady na si Yassi Pressman ang paglilibot sa iba’t ibang bahagi ng bansa upang ikampanya ang #54 Ang Probinsyano Party-list.

Noong Huwebes ay pinangunahan ni Coco ang grupo ng #54 Ang Probinsyano Party-list sa ginawang panga­ngam­panya sa siyudad ng Ormoc.

Gaya ng inaasahan ay dinumog ng tao ang aktor na mainit ding tinang­gap ng kapwa artista at nga­yo’y Ormoc City Mayor Richard Gomez at asa­wang si Rep. Lucy Tor­res sa  isinagawang rally sa Ormoc City Superdome.

Wala pang isang ling­go ang nakakalipas noong nag-ikot din si Coco sa lalawigan ng Albay at Camarines Sur upang hingin ang suporta ng mga Bicolano para sa #54 Ang Probinsyano Party-list.

Mula Ormoc ay naka­takda rin maglibot sa 9 Mayo si Coco sa lalawigan ng Bohol at sa Camotes Island upang tiyakin ang panalo ng #54 Ang Probinsyano Party-list.

Kasabay nito ay lilibot din si Yassi sa lalawigan ng Cebu na siya namang bumisita sa lalawigan ng Samar noong nakaraang Martes.

Inaasahan din na pupunta si Yassi sa lala­wigan ng Ilocos Norte para paunlakan ang mga Ilokano supporters ng #54 Ang Probinsyano Party-list.

Bukod kina Coco at Yassi ay aktibong tumu­tulong sa kampanya ng #54 Ang Probinsyano Party-list ang iba pang showbiz personalities tulad ng aktres na si Ryza Cenon na isa sa mga pangunahing karakter sa teleseryeng The General’s Daughter at ang Viva artist na si Ella Cruz.

Habang nasa Ormoc si Coco noong Huwebes ay kasabay namang nag-iikot si Ryza sa iba’t ibang bayan ng lalawigan ng Misamis Oriental.

Naglibot si Ryza sa pamamagitan ng motor­cade kasama si reelec­tionist Governor Yevgeny Vicente “Bambi” Emano sa mga bayan ng Opol, Lugait, El Salvador, Alu­bijid, Laguindingan, Gita­gum, Libertad at Initao.

Inikot din nina Ryza ang mga bayan ng  Naa­wan at Mantincao bago bumalik sa bayan ng Libertad para sa isang Grand Rally.