Matibay, ligtas na pabahay seguruhin — PBB Party-list

IPINASISIGURO ng Partido ng Bayan ang Bida (PBB) Party-list na matibay ang konstruksiyon ng mga govern­ment housing unit kasunod ng 6.1 magnitude na lindol na yumanig sa Metro Manila at Central Luzon kamakalawa.

Sinabi ni PBB Party-list 1st nominee Atty. Imelda Cruz, mahalagang masiguro na ligtas at matibay ang mga pabahay ng gobyerno ga­yon­din ang iba’t ibang estruktura kasunod ng 6.1 lindol na naging dahilan ng pagguho ng isang 4-storey supermarket sa Porac, Pampanga.

Tatlo ang kompirmadong nasawi sa gumuhong super­­market habang dala­wa katao rin ang namatay sa Lubao matapos mabag­sakan ng gumuhong pader kamakalawa ng hapon.

“Mahalagang matiyak na matibay ang itinatayong housing units gayondin ang high-rise condominium upang masigurong ligtas ang mga nakatira rito,” paliwanag ni Atty. Cruz ng PBB.

Isusulong ng PBB sa Kongreso ang mura, disente at abot-kayang pabahay sa mga Filipino kasunod ng ulat na mahigit 6 milyon ang backlog ng gobyerno sa housing units.

“Dapat matiyak din ng gobyerno na matibay at ligtas na tirahan ang itata­yong housing units kapag naulit ang katulad na pag­yanig,” giit ng PBB.