HATAW! D'yaryo ng Bayan hatawtabloid.com
PATAY ang isang welder matapos saksakin ng kapwa welder makaraan ang mainitang pagtatalo sa Caloocan City, kahapon ng madaling araw.
Dead on arrival sa Caloocan City Medical Center (CCMC) ang biktimang kinilalang si Ronel Languita, 23 anyos, residente sa West Avenue, Brgy. Bungad, Quezon City sanhi ng mga saksak sa katawan.
Kinilala ni Caloocan police chief P/Col. Restituto Arcangel ang suspek na si Joshua Flores, 21 anyos, ng Tondo, Maynila na agad na naaresto sa follow-up operation ng mga tauhan ng Police Community Precinct (PCP) 2 ilang metro ang layo sa pinangyarihan ng insidente.
Batay sa pahayag sa pulisya ng saksing si Rogie Zabala, dakong 3:15 am nang magkaroon ng pagtatalo sa pagitan ng biktima at ng suspek sa kahabaan ng J Teodoro St., Brgy. 48.
Sa kainitan ng pagtatalo, biglang naglabas ng patalim si Flores at inundayan ng saksak sa katawan si Languita bago mabilis na tumakas patungo sa Rizal Avenue Ext., habang isinugod ang biktima ng nagrespondeng si Brgy. 48 Chairman Ronald Reyes sa naturang pagamutan.
(ROMMEL SALES)
