HATAW! D'yaryo ng Bayan hatawtabloid.com
HUMINGI ng paumanhin si Aiko Melendez sa ABS-CBN dahil hindi niya magagawa ang Sandugo, ang bago sana niyang teleserye mula sa Dreamscape Entertainment. Kailangan kasing masamahan ni Aiko ang Subic Mayor BF sa pangangampanya nito bilang bise-gobernador ng Zambales.
Pangako ni Aiko, “babawi po ako sa inyo. Mas kailangan lang talaga ako ngayon ni Jay (Subic Mayor Jay Khonghun). Kaya pasensya na po.”
Nakapagpaalam naman ng maayos si Aiko sa pamamagitan ng kanyang manager na si Boy Abunda.
“Hindi namin kasi nakita itong mangyayari, itong nangyayari ngayon sa sitwasyon namin ni Jay,” paliwanag pa ni Aiko sa thanksgiving party niya, na ginawa sa Chateau 1771, para sa kanyang double victory bilang Best Supporting Actress for Rainbow’s Sunset at sa 2018 Metro Manila Film Festival, at Gawad Pasado Awards 2019.
Napag-alaman naming ginawa talaga para kay Aiko ang papel na gagampanan niya sana sa Sandugo.
Napunta naman ang proyekto kay Vina Morales.
“Maybe hindi talaga para sa akin dahil mas kailangan ako ni Jay ngayon,” giit pa ng aktres.
Samantala, itinanggi naman ni Aiko na engaged na sila ni Mayor Jay dahil sa picture nila na ipinost sa social media.
“Mayroon kaming calendar na ipapamigay sa buong Zambales at gusto namin ipakita ang ganda ng Zambales,” paliwanag ni Aiko.
Ukol naman sa planong paglagay nila sa tahimik, sinabi ng alkalde na, “Siyempre, oo naman. Ako na ang sasagot niyan. Oo naman.
“Aiko is a very good person.
“At napakasuwerte ang kahit sinong lalaki na makakakita ng katulad niya.”
SHOWBIZ KONEK
ni Maricris Valdez Nicasio
