HATAW! D'yaryo ng Bayan hatawtabloid.com
PATAY ang isang ‘negosyante’ na sinabing big time supplier ng party drugs nang mauwi sa palitan ng putok ang ikinasang buy bust operation ng mga tauhan ng Philippine Drug Enforcement Agency (PDEA) at Regional Drug Enforcement Unit ng National Capital Region Police Office (NCRPO) sa isang condominium building sa Sta. Cruz, Maynila, nitong Martes nang madaling araw.
Nakuha ang mahigit P.3 milyong halaga ng mga ipinagbabawal na gamot tulad ng shabu at ecstasy sa suspek na kinilalang si Steve John Pasion.
Arestado ang kinaksama ni Pasion na isinasailalim sa imbestigasyon.
Sa ulat, nabatid na nagsagawa ang PDEA ng buy bust operation laban kay Pasion sa isang condominium tower nang biglang bumunot ng baril ang suspek nang makahalata na pulis ang kanyang katransaksiyon.
Nabaril ang suspek habang tumatakas sakay ng isang SUV na dahilan ng kanyang agarang pagkamatay.
Ayon kay PDEA-NCR Director Joel Plaza, si Pasion ang pinakabigating supplier ng party drugs sa Metro Manila na target ang mga kabataan, mga artista, at mga modelo.
Kabilang umano sa mga parokyano ng suspek ang dalawang hindi pinangalanang ‘high profile celebrities.’
HATAW News Team
