Buy-bust sa Vale, 7 huli

PITONG lalaki na hinihinalang sangkot sa ilegal na droga kabilang ang isang sinasabing tulak na target ng isinagawang buy-bust operation ng mga pulis sa Valenzuela City ang inaresto, kahapon ng madaling araw.

Ayon kay Valenzuela police chief S/Supt. David Nicolas Poklay, dakong 12:10 am nang magsagawa ang mga operatiba ng Station Drug Enforcement Unit sa ilalim ng pamumuno ni Chief Insp. Jowilouie Bilaro ng buy-bust operation laban sa isang Freddie Tayco sa Lower Tibagan, Brgy. Ugong, ng nasabing lungsod.

Nagawang makabili sa suspek ng isang sachet ng shabu na nagkakahalaga sa P300 ng isang pulis na nagpanggap na poseur-buyer at nang makaabutan agad lumapit ang iba pang mga operatiba at inaresto si Tayco.

Napansin ng mga operatiba sina Jose Lenny Balajadia, Peit Regatcho, Timoty Marinduque, Rogelio Hubilla, Rodante Dellosa, at Ronald Loyola na sumisinghot umano ng shabu sa loob ng isang walang numerong bahay sa naturang lugar na nagresulta sa pagkakaresto sa kanila.

Nakompiska sa mga suspek ang limang plastic sachet na naglalaman ng hinihinalang shabu, buy-bust money, ilang drug paraphernalia at itim na coin purse. (ROMMEL SALES)