HATAW! D'yaryo ng Bayan hatawtabloid.com
PATAY ang driver ng Infanta mayor na kilalang operator ng quarry at small town lottery (STL) sa nasabing lalawigan nang pagbabarilin ng hindi pa kilalang suspek sa isang lamayan sa nasabing lalawigan nitong Miyerkoles nang gabi.
Hindi rin nakaligtas sa kamatayan ang kanyang tatlong kaanak, kabilang ang dalawang septuagenarian nang sunod-sunod na nagpaputok ang suspek para tiyakin ang kamatayan ng main target na si Michael Cuento, 50 anyos.
Sinabi ni Colonel Osmundo de Guzman, Quezon police provincial director, dakong 8:45 pm nang biglang sumulpot ang hindi pa kilalang suspek at pinagbabaril gamit ang .45 kalibre ng baril ang mga biktima habang nakikipaglamay sa isang kapitbahay sa Sitio Irrigation, Barangay Ilog sa nasabing bayan.
Kinilala ang iba pang biktimang namatay na sina Herman Cuento, 70; Leon Cuento, 73; at Manuel Cuento, 41, na namatay habang isinusugod sa Claro M. Recto Memorial District Hospital.
Samantala, sugatan sina Maximo Cuento, 65, at Napoleon Miras, 68, kapitan sa kalapit na barangay na dinala rin sa nabanggit na ospital.
Tumakas ang suspek gamit ang isang motorsiklo na minamaneho ng isa niyang kasabwat.
Sa panayam kay De Guzman, sinabi niyang bigla na lang sumugod sa lamayan ang suspek at agad binaril ang main target si Michael.
Nilapitan pa umano ng suspek si Michael at sunod-sunod na binaril upang tiyaking patay ang biktima.
Dagdag ng pulisya, nabaril ang iba pang biktima dahil sa sunod-sunod na pagpapaputok ng baril ng suspek.
Inihayag ni De Guzman, nauna nang nakaligtas sa tangkang pagpatay noong 2016 si Michael at kasalukuyan pang nakakulong ang suspek.
Ayon naman kay Infanta Mayor Grace America, official driver ng kanyang opisina si Michael at tagahawak din ng quarry permit sa kanilang lugar.
Dagdag ng alkalde, nagpahayag ng pangamba si Michael tungkol sa nalalapit na eleksiyon lalo’t magkakaroon ng gun ban.
Nangyari ang ambush noong 2016, panahon din ng eleksiyon at may ipinatutupad na gun ban ngunit nakaligtas ang biktima.
Pinayohan umano ng alkalde si Michael na mag-ingat upang hindi mangyari muli ang tangkang pagpatay sa kaniya ngunit hindi segurado kung ang mga tangkang pagpatay ay may kinalaman sa politika.
Sinabi ni Major Hobert Sarmiento, officer-in-charge ng Infanta police, muli umanong iniimbestigahan ang unang tangkang pagpatay upang malaman kung konektado sa pagpaslang sa kaniya.
Dagdag ni Sarmiento, tinitingnan din nila ang negosyo ni Michael bilang quarry operator at namamahala sa operasyon ng STL sa Infanta na posibleng may kinalaman sa pagpaslang sa kanya.
HATAW News Team
