Dahil sa tagtuyot… 5 bayan isinailalim sa state of calamity

IDINEKLARANG nasa state of calamity ang limang bayan sa Cotabato dahil sa matinding tagtuyot na nararanasan sa Mindanao.

Ayon kay Engineer Arnulfo Villaruz, warning and action officer ng Cotabato Provincial Disaster Risk Reduction and Management Council (PDRRMC), at sa pagsubaybay ng Philippine Atmospheric, Geophysical and Astronomical Services Administration (PAGASA), napabilang ang Rehiyon 12 sa “low amount of rainfall” at halos lahat ng mga bayan ay nakararanas ng sobrang init ng panahon.

Kabilang ang mga bayan ng Pikit, Aleosan, M’lang, Alamada, at Tulunan, North Cotabato kaya isinailalim sa state of calamity.

Lubos na apektado ng tagtuyot ang ekta-ektaryang pananim at bumaba rin ang lebel ng tubig sa malalaking ilog.

Namigay na rin ng tulong ang provincial government sa pamamagitan ng Cotabato-PDRRMC sa mga bayan na sinalanta ng tag-init.