Para sa MRT 7 construction… Tandang Sora flyover, Commonwealth intersections 2 taon isasara — MMDA

BILANG paghahanda sa konstruksiyon ng MRT-7 Tandang Sora station at elevated guide way and pocket track isasara ang apat na lane ng Tandang Sora flyover at intersection sa Com­monwealth Avenue.

Pinaghahanda ng Metropolitan Manila Development Authority (MMDA) ang mga motorista sa mabigat na trapiko bunsod ng gagawing pagsasara ng Tandang Sora flyover at intersection para sa konstruksiyon ng Metro Rail Transit (MRT) 7 sa susunod na linggo.

Simula 11:00 pm sa 23 Pebrero, ang apat na lane ng Tandang Sora flyover at intersection sa Commonwealth Avenue ay isasara.

Ayon ito kay MMDA General Manager Jojo Garcia sa isang pulong balitaan sa tanggapan ng ahensiya sa lungsod ng  Makati.

Dalawang taon mag­­ta­tagal ang closure na makaaapekto sa higit 100,000 motoristang bumi­­biyahe sa Com­monwealth Avenue at 2,000 hanggang 3,000 motoristang tumata­wid sa Tandang Sora intersec­tion.

Ida-divert sa isang temporary U-turn slot na may layong 500 metro mula sa Tandang Sora intersection ang mga apektadong motorista.

Sinabi ni Garcia, ang paglalagay ng elevated U-turn slot sa lugar ay iminungkahi ng MMDA para makatulong na mapagaan ang daloy ng mga sasakyan kung saan ginagawa ang MRT 7.

“Inutusan na natin si Director Neomie Recio ng MMDA Traffic Enginee­r­ing Center para bisita­hin ang lugar at pag-aralan kung saan ilala­gay ang elevated U-turn,” ani Garcia.

Ang panukalang elevated U-turn slot na gawa sa bakal ay maa­aring maitayo sa loob nang tatlong buwan. May kabuuang 10 lanes ang Commonwealth Avenue.

“Habang hinihintay ang konstruksiyon ng elevated U-turn slot, maaaring gamitin ng mga motorista ang temporary U-turn slot,” dagdag ni Garcia.

Magde-deploy ang MMDA ng 154 person­nel para gabayan ang mga motorista habang nasa 100 flagmen na­man sa Common­wealth Avenue ang itatalaga ng lokal na pamahalaan ng Quezon City. (JG)