PCP chief, 4 pa sinibak sa ‘molestia de areglo’

SINIBAK sa puwesto ni National Capital Regional Police Office (NCRPO) Director Guillermo Eleazar ang limang pulis kabilang ang kanilang commander matapos payohan ang mga magu­lang ng tatlong estu­dyante na minolestiya ng isang Chinese national na ayusin umano ang kaso sa Pasay City.

Inalis sa puwesto ang commander ng Police Community Precinct (PCP-1) ng Pasay City Police na si Chief Insp. Remedios Terte, mga tauhan na sina SPO3 Timothy Mengote, SPO2 Jonathan Bayot, POs3 Archie Rodriguez at Ranier Dumanacal.

Napag-alaman nitong Huwebes (7 Pebrero ), dakong 11:00 pm, inaresto ng limang pulis ang suspek na si Zhang Yang, 19 anyos, pan­sa­mantalang nanunuluyan sa Antel Tower sa Pasay City, sa amusement park, sa nabanggit na lungsod.

Nauna rito naka­tanggap ng reklamo ka­ug­nay sa sinabing pang­momolestiya sa tatlong estudyante na edad 18 anyos sa nabanggit na amusement park.

Nang dalhin ang suspek sa presinto (PCP-1), pinayuhan umano ang mga ina ng mga biktima, na ayusin na lamang ng mga suspek.

Pero hindi pumayag ang mga biktima at mga magulang nila at tulu­yang sinampahan ng kasong Acts of Las­civiousness ang dayuhan sa Pasay City Pro­secutor’s Office.

Nagreklamo ang ma­gu­lang ng mga biktima sa tanggapan ni Eleazar ukol sa naging payo sa kanila ng mga pulis.

Agad na sinibak ng NCRPO Chief ang limang pulis-Pasay kabilang ang kanilang commander.

(JAJA GARCIA)