19-anyos Chinese national binangungot?

NATAGPUANG wala nang buhay ang isang 19-anyos Chinese national sa loob ng kanyang con­do­minium unit sa Pasay City, iniulat kahapon.

Kinilala ni Pasay City Police chief, S/Supt. Noel Flores, ang biktima na si Chen Rongzhen, nanini­rahan sa Unit 1203, Tower B, Shell Residence Condo­minium na matatagpuan sa Sunrise Drive, MOA Complex, Barangay 76, Pasay City.

Sa isinagawang pag­si­siyasat nina  SPO3 Genomar Geraldino at PO2 Jimmy Rufo, ng Pasay City Police, natag­puan ng kanyang room­mate na si Su Guizhang, 32, may asawa, IT emplo­yee ng Eastfield Center, isa rin Chinese national, ang biktima na walang malay at hindi na kumi­kilos sa loob ng kanyang silid sa nabanggit na condo unit, dakong 10:40 ng umaga.

Agad tinawagan ni Guizhang ang kanilang Chinese Administrative Officer na si Zhang Yuhong upang ipaalam ang kondisyon ni Rong­zhen kaya agad tumawag sa Lifeline Makati Medical Center para magpadala ng ambulansiya.

Pero pagdating ng medical personnel, naba­tid nilang wala nang pulso at malamig na ang katawan ng biktima.

Sa pahayag sa pulisya ni Guizhang, bago matagpuang patay ang roommate, kumain uma­no ng maraming seafood at sobrang nalasing ang biktima noong Sabado ng gabi.

Sa pagsusuri ng SOCO-SPD team sa pangunguna ni S/Insp. Elena Mediana, walang nakitang mga sugat sa katawan ni Rongzhen.

Dinala ang labi ng biktima sa Veronica Fune­ral Parlor para sa awtop­siya.