Malacañang employee timbog sa ‘sextortion’

ARESTADO ang isang empleyado ng Mala­cañang Palace  sa iki­nasang entrapment ope­ra­tion ng mga awtoridad makaraan pagbantaan ang dating girlfriend na ia-upload ang kanilang sex video at mga hubad na retrato kapag hindi naki­pagkita sa kanya sa Malabon City, kama­kalawa ng gabi.

Dakong 7:30 pm nang madakip ang suspek na si alyas Romel, 40-anyos, support officer ng Citizen Complaint Hotline sa Malacañang Palace, at residente sa Tanza, Cavite, nahaharap sa ka­song light threat in relation to RA 9262 at Anti-Photo and Voyeurism Act of 2009 sa Malabon City Presecutor’s Office.

Batay sa ulat nina  PO3 Corazon Nuque at PO2 Mary June Belza ng Women and Children’s Protection Desk (WCPD), halos tatlong buwan nang magkarelasyon ang suspek at ang biktimang si alyas Katya, 30-anyos, call taker ng nasabing opi­sina sa Palasyo, at resi­dente sa Malabon City.

Ayon sa biktima, dahil sa ilang ulit na hindi pagkakaunawaan, nag­pa­sya siyang tapusin ang kanilang relasyon ngunit hindi pumayag ang suspek. Bunsod nito, pinag­bantaan ng suspek ang biktima na ia-upload ang kanilang sex video at hubad na retrato sa social media kaya napilitan ang babae na sundin ang mga iniuutos ng lalaki.

Kamakalawa ng gabi, hiniling ng suspek na muli silang magkita ngunit tumanggi ang biktima.

Dahil dito, muling nagbanta ang suspek na ilalabas sa internet ang kanilangs sex videos at hubad na retrato.

Ngunit humingi ng tulong ang biktima sa pulisya na agad nagkasa ng entrapment operatipn na nagresulta sa pagka­kadakip sa suspek.

(ROMMEL SALES)