HATAW! D'yaryo ng Bayan hatawtabloid.com
TUMALON ang isang 14-anyos dalagita sa floodway sa Taytay, Rizal makaraang buyuhin ng mga kaibigan habang nag-iinoman dakong 8:00 pm noong Martes.
Sinisid ng special operations unit ng Philippine Coast Guard (PCG) ang Manggahan Floodway sa Brgy. San Juan, Taytay, Rizal dakong 1:00 am nitong Miyerkoles para sagipin ang biktimang kinilalang si Stella Gliane.
Kuwento ng kapatid ng biktima na si alyas Didith, kainoman ng dalagita ang kaniyang mga kaibigan nang mangyari ang insidente.
“Nagbibiruan ‘ata na tumalon… Ang ano niya sa barkada, baka binu-bully [siya]. Siya raw ang sinisisi po sa mga away-away… Ilang araw niyang dinaramdam,” hinaing ni Didith.
Masayahing bata umano ang biktima ngunit napansin nilang matamlay nitong nakaraang araw.
May mga palitan din ng mensahe sa Facebook ang magbabarkada nang hindi nila pagkakasunduan.
Samantala, 2:30 am kahapon, nagpasya ang PCG na pansamantalang itigil ang search and rescue operations.
“Medyo malakas ang current kaya posibleng inanod siya. ‘Di natin ito titigilan. Sa situwasyong ito, hindi lalayo ang katawan,” ayon kay PO1 Edwin Marquez, team leader ng naturang operasyon.
