Sobrang laruan ipamasko — NPDC

KAUGNAY ng nalalapit na Kapaskuhan, nanawagan si National Parks Development Committee (NPDC) executive director Penelope Belmonte sa mga may sobrang laruan na huwag itapon at sa halip ay i-donate sa mga alagang bata ng “We Care, Day Care” (WCDC) center.

Ang nasabing center ay itinatag ni Belmonte may ilang buwan na ang nakalilipas upang tulungan ang mga batang mahihirap at nakatira sa kalsada, ganoon din ang kanilang edukasyon sa antas nursery.

“We call on those who have more in life to please share their blessings. Instead of throwing away old toys, donate them. They will go a long way to make less-privileged children happy,” ani Belmonte at aniya, ang mga interesadong mag-donate ay maaaring magbigay nang direkta sa mga batang nasa WCDC.

Ayon kay Belmonte, maging ang mga gamit na damit at vitamins ay “welcome” din at malaki ang maitutulong sa mga ginagawa ng tauhan ng NPDC upang maiparamdam kahit paano sa mga bata ang normal na buhay.

Ang WCDC center ay nagsasagawa ng mga aktibidad na tulong sa mga batang kalye at mahihirap, kasama ang pagibigay ng mga pangunahing pangangailangan kagaya ng pagkain, damit at gamot.

Binibigyan din sila ng nursery education at wastong hygiene upang mailayo sa anumang uri ng sakit na dulot ng poor hygiene.

Tuwing Biyernes ay pinangungunahan ni Belmonte ang “Children’s Day” sa pamamagitan ng pagtitipon niya sa mahihirap na bata na nagkalat sa paligid ng NPDC para pakainin at i-tour sila sa mga palaruan at sa buong parke.