Nora, nabago ang oras ng taping dahil nagkakasakit

INAASAHAN na sa ating Superstar Nora Aunor na madali nang mapagod dahil nasa senior age na ito. Kaya nga, hindi naging malaking isyu sa mga Noranian nang baguhin ang cut-off niya sa taping ng Onanay sa GMA-7.

“Actually may cut-off ako na hanggang 10:00 p.m.. Pero sa ngayon, kasi dahil naospital ako sabi ng mga doctor, mga 5:00 p.m.. Pero puwede naman hanggang 7:00 p.m.. Basta naglalaro roon sa oras na ‘yun,” paliwanag ng ating Superstar sa isang panayam.

Maraming natuwang mga Noranian nang kumalat sa social media ang mga picture na pumirma ng kontrata si Nora noong May 10, 2018 sa pag-aakalang magiging GMA-7 contract star na ito pero para lang ‘yun sa kanyang Onanay project.

Hindi natin masisisi ang mga ito dahil dinaluhan ito ng Senior Vice President for GMA Entertainment Content Group Lilybeth Rasonable at GMA AVP for Drama Cheryl Ching-Sy.

Sa isang panayam, inamin ni Nora na tumatanaw siya ng utang na loob sa GMA-7. ”Alam mo ang GMA, mahal na sa puso ko ‘yan, dahil ang GMA kasi maski noong araw, sila talaga ang nakakaisip na ako’y kunin nila at bigyan ako ng proyekto. At ‘yun naman ay tinatanaw ko ng malaking utang na loob.”

Kaya niya tinanggap ang Onanay project ay dahil gusto niya ito. ”Gusto ko ‘yung teleserye at maganda ‘yung istorya, tungkol sa kung paano magmahal ang isang ina sa isang anak, at kung paano ipagtanggol ang isang anak ng ina.”

Ipinakilala bilang anak ni Nora sa Onanay si Jo Berry, si Onay sa papel na isang unano as in, isa itong true-to-life.

“Alam mo sa buhay kasi, maski na sa totoong buhay, nangyayari ‘yan, eh. ‘Di ba, hindi natin alam kung ano ‘yung lalabas sa atin, eh, hindi natin alam kung ano ‘yung ibibigay sa atin ng Diyos. So rito sa istorya ‘yun ‘yung ibinigay sa akin ng Diyos. So, kailangang tanggapin ko, kailangang ipagtanggol ko, kailangang mahalin ko.”

STARNEWS UPLOAD
ni Alex Datu