HATAW! D'yaryo ng Bayan hatawtabloid.com
ALANGAN namang si Ronaldo Valdez o si Rey Valera o si Romy Vitug ang “R.V” na tinutukoy ng kapatid ni Digong na si Jocelyn Duterte sa kanyang post, sino pa ba kundi si Regine Velasquez?
Obvious na sagot ‘yon ng ginang sa recent post ni Regine tungkol sa “stupid God” reference ni Digong (who, in fairness, ay nag-sorry kay God kamakailan).
Simple lang ang buod ng post ng Asia’s Songbird, tanggap niya ang pananaw ng Pangulo pero sana naman ay huwag nang idamay ang Panginoon dahil hindi naman ito namumulitika.
Pero iba ang pagkaka-interpret ni Mrs. Jocelyn, pakikisawsaw daw ‘yon sa isang isyu ng mga artistang laos.
Kung tutuusin, may point naman ang ginang nang sabihin niya na may mga artistang laos na ang ginagawang fallback ay pasukin ang politika. Gayong hindi naman niya nilalahat, malinaw na hindi ‘yon nag-a-apply kay Regine.
Hindi yata wastong ibunton ni Ms. Jocelyn ang kanyang pagiging anti-showbiz kay Regine, na alam naman nating lahat na malayong malaos sa kanyang kinalalagyan ngayon.
At ano naman ang masagwa sa post ni Regine, eh, sa bandang dulo’y hinihikayat pa nga ng Asia’s Songbird na ipagdasal ang kanyang kapatid?
This being a supposedly free country, malaya ang bawat isa sa atin na ipahayag ang ating mga saloobin tungkol sa mga isyung may kinalaman sa ating lipunan. Pakikisawsaw ba ang tawag doon?
So, anongg problema ng Presidential Sister na ito na sa halip na tumahimik na lang ay nagpatutsada pa sa mga artistang laos na walang ibang career choice kundi ang pumasok sa politika?
Inaasahan naming mas mapagkumbaba pang sasalagin ni Gng. Jocelyn ang mga bira laban sa kanyang kapatid, hindi ang mang-alipusta ng mga artista, na kung pumasok man sa politika ay hindi na niya problema.
Bakit siya apektado?
Tama siya, ang pllitika ay paglilingkod sa taumbayan. Rebyuhin kaya ni Mrs. Jocelyn ang mga itinalaga ng kapatid niya na pinagsisibak din ni Digong dahil mga corrupt din pala ang mga hinayupak?
Baka si Cesar Montano lang ang gusto niyang gawing halimbawa, nilahat na niya.
At uulitin namin, baka ibang artista ang laos na pinatutsudahan ni Mrs. Duterte, hindi si Regine Velasquez.
At ipagpalagay man nating laos na si Regine, at least sumikat naman!
HOT, AW!
ni Ronnie Carrasco III
