HATAW! D'yaryo ng Bayan hatawtabloid.com
PATAY ang isang hinihinalang drug pusher na ginagamit ang kanyang bahay bilang drug den, sa isinagawang buy-bust operation, habang arestado ang kanyang kapatid at isa pang kasabwat sa Valenzuela City, kamakalawa ng hapon.
Ayon kay Valenzuela police chief, S/Supt. David Nicolas Poklay, dakong 5:45 pm nang ikasa ng mga tauhan ng Station Drug Enforcement Unit (SDEU) ang buy-bust operation sa koordinasyon sa PDEA, kontra kay Rommel Olazo, 45, sa labas ng kanyang bahay sa Sitio Kabatuhan, Gen. T. De Leon sa nabanggit na lungsod.
Nang iabot ni Olazo ang isang plastic sachet ng shabu sa pulis na umaktong poseur buyer, kapalit ng P500 marked money, ay natunugan ang presensiya ng mga pulis sa lugar kaya agad naglabas ng baril at nagtangkang tumakbo dahilan upang paputukan siya ng humahabol na mga operatiba. Isinugod ang duguang suspek sa Valenzuela Medical Center ngunit hindi umabot nang buhay. Arestado ang kanyang kapatid na si Rouel Olazo, 42, at isa pang kasabwat na si Jerecho Pelenio, 37, nang maaktohang bumabatak ng shabu. (ROMMEL SALES)
