HATAW! D'yaryo ng Bayan hatawtabloid.com
TANTANGAN, South Cotabato – Pinatay sa saksak ang kanyang dalawang paslit na anak at pagkaraan ay nagsaksak sa sarili ang isang 29-anyos lalaki sa bayang ito, nitong Martes ng umaga.
Kuwento ng kapatid ng suspek, nasa isang compound lang sila ngunit may sariling bahay ang suspek.
Sa lola natutulog ang anim na mga anak ng suspek habang nasa Maynila ang kanilang ina dahil inaayos ang aplikasyon para magtrabaho abroad.
Nitong Lunes ng gabi, pilit na kinukuha ng suspek ang tatlong anak niyang lalaki.
Tumangging sumama ang 12-anyos na anak dahil natatakot sa ama. Ngunit nilambing niya ang dalawang biktimang may gulang na 3 at 5 kaya sumama sa kaniya na matulog sa kanilang bahay.
Kinaumagahan, nagtaka ang mga kaanak na hindi pa gumigising ang mga bata na kadalasan ay maagang bumabangon.
Noong inusisa nila sa loob ng bahay, doon nila nakita ang duguang katawan ng mga bata at ng suspek.
Batay sa imbestigasyon ng Tantangan Police Station, mag-iisang buwan pa lang nang umalis ang ina ng mga bata.
Ngunit kapag hindi raw tumatawag ang ginang sa mister, madalas daw magbanta ang suspek sa misis na papatayin ang kanilang mga anak.
“Papatayin nga raw niya ‘yung mga bata dahil po sa matinding selos,” ani S/Insp. Reden Crisologo, officer-in-charge ng Tantangan Police Station.
Lasing umano ang suspek nang gawin ang krimen dahil nakipag-inoman sa isang kamag-anak bago ang insidente.
