Reyes kompiyansa kontra Australia

KOMPIYANSA si Gilas Pilipinas coach Chot Reyes na kaya nilang talunin ang Australia Boomers pagharap nila ngayong gabi sa first round ng FIBA World Cup qualifiers sa Philippine Arena sa Bocaue, Bulacan.

Nasa second place sa Group B ang Gilas tangan ang 4-1 record, haharapin ng Pilipinas ang Aussie sa alas-7:30 ng gabi.

Para kay Reyes mas malakas ang Australia ngayon kumpara noong una silang magkita.

Sasandalan ng Gilas ang kanilang momentum matapos nilang  kalusin ang Chinese Taipei, 93-71 noong Biyernes ng gabi sa Taipei Heping Basketball Gymnasium sa Taiwan capital.

Asahang dadagsa ang mga Pinoy fans sa Philippine Arena upang suportahan ang Nationals.

“I can’t tell the level of optimism. But there’s no quit in this team. We just keep on fighting, and we’ll see what will happen,” hayag ni Reyes.

Namuno sa opensa para sa Gilas sina JunMar Fajardo na kumana ng 22 puntos at Andrey Blatche na may double-double game matapos ilista ang 13 points, 12 rebounds, limang assists at tatlong steals habang si play­makers Terrence Romeo at Jayson Castro ay may pinagsamang 29 markers at 10 assists.

Kaya paniguradong sina Fajardo, Blatche, Romeo at Castro ang huhugutan ng lakas ng Gilas para masilo ang importanteng panalo. (ARABELA PRINCESS DAWA)