HATAW! D'yaryo ng Bayan hatawtabloid.com
INIUTOS ni Philippine National Police (PNP) chief, Director General Oscar Albayalde nitong Huwebes ang pagsibak sa 10 police officers mula sa Bulacan dahil sa umano’y pangongotong.
Sinabi ni Counter-Intelligence Task Force (CITF) commander, S/Supt. Romeo Caramat, ang sampung pulis ay sinampahan ng mga kasong kidnapping, robbery in band at paglabag sa Anti-Graft and Corrupt Practices Act dahil sa paghingi ng pera kapalit sa paglaya ng ilang indibiduwal na inaresto sa “unkown crime.”
Kinilala ang mga sinibak na sina S/Insp. Wilfredo Dizon Jr., SPO4 Gary Santos; SPO2 Christopher Aragon; SPO1 Dante Castillo; SPO1 Jophey Cucal; SPO1 Rolando Ignacio Jr; PO3 Dennis De Vera; PO2 Rosauro Enrile; PO2 Nicanor Bautista; at PO2 Chester Say-eo.
Ang nasabing mga pulis ay kinilala ng mga complainant na nagsabing humingi sa kanila ng P50,000 kapalit ng kanilang paglaya makaraan silang arestohin noong 19 Mayo.
Sinabi ni Albayalde, ikinokonsidera nilang ilipat ang sampung police officers sa mga lugar na nangangailangan ng maraming pulis.
“Una na silang nahainan ng kaso and they’ll be filed administrative cases also at ipinapa-relieve na muna natin sila from Police Regional Office 3,” ayon kay Albayalde.
“Nagbigay na ko ng direktiba as of today na i-relieve muna natin sila temporarily and probably candidate din sila na puwedeng dalhin sa mga lugar kung saan kulang ang ating mga pulis,” dagdag niya.
Sinabi Bulacan Police Provincial Office acting director, S/Supt. Chito Bersaluna nitong Miyerkoles, si Supt. Rizalino Andaya ay sinibak din sa kanyang puwesto dahil sa command responsibility.
