Graft charges vs Customs official isinampa ng NBI

SINAMPAHAN ng kasong graft ang isang dating opisyal ng Bureau of Customs (BoC) kasama ang kanyang asawa at dalawa pang indibiduwal alinsunod sa kampanya ng National Bureau of Investigation (NBI) laban sa korupsiyon.

Kinilala ni NBI director Dante Gierran ang dating Customs official na si Atty. Larribert Hilario, dating hepe ng Customs Risk Management Office (CRMO) bago nagbitiw kamakailan.

Kasama sa sinampahan ng kaso sa Tanggapan ng Ombudsman ang misis ni Hilario na si Maria Concepcion at personal driver ng dating opisyal na si Dino Dotingco at isang Jerlie Adel.

Sinampahan ng NBI ang tatlo ng kasong paglabag sa Republic Act 6713 o ang Code of Conduct and Ethical Standards for Public Officials and Employees; RA 3019 o Anti-Graft and Corrupt Practices Act; RA 1379 o Act Declaring Forfeiture in Favor of Government of Unlawfully Acquired Property at falsification of public documents sa ilalim ng Article 171 ng Revised Penal Code.

Ayon sa record ng NBI, nag-ugat ang kaso laban kay Hilario mula sa report na natanggap ng NBI na may naimpok na ilegal na yaman ang dating Customs official.

Batay sa nasabing report, agarang nagsagawa si Gierran ng imbestigasyon at matagumpay na nakalikom ng mga ebidensiya mula sa BoC, kabilang ang mga certified true copy ng statement of assets, liabilities and networth (SALN); appointment paper at personal data sheet ni Hilario.

Bukod dito ay nakakuha rin ng mga record ang NBI mula sa Land Registration Authority (LTA), Land Transportation and Franchise Regulatory Board (LTFRB) at Manila Business Permit and Licensing Office (MBPLO) na nagtuturong lumabag sa batas ang dating Customs official kasabwat ang kanyang asawa, driver at si Adel.

(HATAW News Team)