HATAW! D'yaryo ng Bayan hatawtabloid.com
INIREKOMENDA ng Department of Justice ang paghahain ng kaso laban sa 11 miyembro ng Aegis Juris fraternity bunsod ng kanilang pagkakasangkot sa fatal hazing kay University of Santo Tomas law student Horacio “Atio” Castillo III noong Setyembre 2017.
Hindi kabilang ang homicide charges sa inirekomendang isampa laban sa mga akusado, ayon kay DOJ Acting Prosecutor General Jorge Catalan, Jr., nitong Huwebes.
Sa 49-page resolution na may petsang 6 Marso, sinabi ng DOJ na may nakitang probable cause para sampahan ng kaso ang 10 Aegis Juris members bunsod ng paglabag sa Anti-Hazing Law
Kabilang sa mga kinasuhan sina Arvin Balag, Ralph Trangia, Oliver John Audrey Onofre, Mhin Wei Chan, Danielle Hans Matthew Rodrigo, Joshua Joriel Macabali, Axel Munrio Hipe, Marcelino Bagtang, Jose Miguel Salamat, at Robin Ramos.
Inirekomenda rin ng DOJ ang paghahain ng kasong perjury at obstruction of justice kay John Paul Solano.
Ang mga kaso laban sa 10 iba pang akusado at sa Aegis Juris Foundation ay ibinasura bunsod ng kawalan ng probable cause, habang ang kaso laban kina UST Law dean Nilo Divina at law faculty secretary Arthur Capili ay idinismis bunsod ng kawalan ng sapat na ebidensiya.
Ang kaso laban kay Mark Anthony Ventura, nasa ilalim ng witness protection program ng gobyerno, ay ibinasura rin.
Gayondin, inirekomenda ng DOJ ang further investigation sa 10 iba pang miyembro ng fraternity upang mabatid ang kanilang kaugnayan sa krimen.
Ang mga akusado ay haharap sa criminal complaints para sa murder at paglabag sa Anti-Hazing Law na inihain ng pulisya noong 25 Setyembre 2017.
Si Castillo ay binawian ng buhay dahil sa “severe blunt traumatic injuries” makaraan dumalo sa “welcoming rites” ng Aegis Juris Fraternity.
Ang nasabing trahedya ay naging dahilan nang muling pagtalakay sa hazing, nagresulta sa imbestigasyon ng Senado, at humantong sa pagpapatalsik sa walong UST law students.
