Aktres, muntik sumubsob ang mukha nang mag-dive

MUNTIK nang magwala’t mag-walk out ang isang aktres sa isang TVC shoot dahil sa aniya’y kapalpakan ng production team nito.

“Shampoo commercial ‘yon, kaya ang kinunang eksena, eh, sa swimming pool,” panimula ng aming source. Ang bilin daw ng direktor ay magda-dive ang aktres sa pool, sabay ahon with her medium shot na hawak ang kanyang nabasang buhok.

Ang problema’y hindi pala nasabihan ang aktres na sa mababaw na parte lang pala ng pool siya da-dive, ”Todo emote pa naman ang lola mo, feeling yata niya, eh, Olympic size ‘yung pool. Kung makaporma kasi, eh, feeling niya, kinatawan siya ng Pilipinas sa swimming event!”

Nang mag-dive na raw ang aktres, buti na lang ay tantiyado niya ang kanyang kilos dahil kung hindi’y tiyak na sumubsob ang mukha niya sa sahig ng pool.

“Ang ending, imbiyernang-imbiyerna siya sa production, maano ba naman daw na in-inform siya na hindi pala kalaliman ‘yung dadaybin niyang pool?” sey pa ng aming katsika.

Da who ang aktres na itinuloy na rin ang TVC shoot Hitsurang bad trip siya? Itago na lang natin siya sa alyas na Connie Sagala.

(Ronnie Carrasco III)