HATAW! D'yaryo ng Bayan hatawtabloid.com
KALABAW lang ang tumatanda.
Iyan ang pinatunayan ng beteranong si Willie Wilson matapos ngang sungkitin ang Player of the Week na parangal ng Philippine Basketball Association Press Corps mula 22 hanggang 28 ng Enero.
Pinangunahan ng 37-anyos na beterano ang 87-82 pagsilat ng palabang Phoenix Fuel Masters kontra Barangay Ginebra para iangat ang kanilang kartada sa 3-3 papasok sa kalagitnaan ng Philippine Cup.
Perpekto ang ibinuslo ni Wilson sa larong iyon sa 7-of-7 shooting tungo sa 19 puntos kung saan ang 14 puntos ay nagmula sa pambihirang kampanya ng Phoenix para maitayo ang 49-29 abante na hindi na nila binitiwan hanggang sa dulo.
Nagsahog rin siya ng 5 rebounds, 2 assists at 2 steals sa 25 minutong aksyon lamang kontra sa dating koponan na Barangay Ginebra.
Ginapi ni Wilson, dating 15th overall pick ng Alaska noong 2004 PBA Draft ang kasanggang si Jeff Chan, Maverick Ahanmisi ng Rain or Shine, Vic Manuel at Chris Banchero ng Alaska, Mark Barroca ng Magnolia, June Mar Fajardo ng San Miguel, LA Tenorio at Raymond Aguilar ng Ginebra gayundin sina Kelly Nabong at Jonathan Grey ng Globalport para sa linggohang parangal na iginagawad ng PBA Press Corps.
ni JOHN BRYAN ULANDAY
