Sikreto ng Regal kaya tumatagal, nagdidiskubre ng mga bagong talent

Ed de Leon January 10, 2018 Showbiz

TALAGANG doon sa mga kinikilalang malalaking producers noong araw pa, ang pinakamatibay ay ang Regal. Katatapos lamang ng MMFF na nakasali ang pelikula nilang Haunted Forest, ngayon naman ipalalabas ang isang bago nilang pelikula, iyong Mama’s Girl. Kaya sunod-sunod, kasi naman kumikita ang lahat ng pelikula nila. Hindi siya top grosser, pero kung iisipin mo, baka mas malaki pa ang kinita nila dahil ang mga nakalaban nila, gumastos naman ng sobra-sobra.

“Hindi rin kami nagtitipid sa pelikula namin, kaya lang ang Regal, since the beginning talagang nagbibigay kami ng break sa mga newcomer. Noong una pa, hindi ba we discovered the Regal babies, lahat iyon naging big stars. We believe in giving new stars the break kasi kung hindi natin gagawin iyon, darating ang araw wala na tayong artista sa pelikula. Stars also get old. Mayroon namang iba na pumapasok na sa ibang field.”

“Halimbawa si Vilma Santos, o si Goma (Richard Gomez), parehong pumasok sa politics. Kung wala ka ng ibang stars, paano mabubuhay ang industry? Paano mabubuhay iyong ibang workers kung wala ng artista?

“Kaya sa Regal we make it a point to always discover and help new talents. Halimbawa iyang si Sylvia Sanchez na bida sa ‘Mama’s Girl’, nag-umpisa talaga siya sa Regal, and look where she is now. Iyon din ang nakita kong potentials ni Diego Loyzaga at ni Sofia Andres, kaya I gave them the break,”sabi pa ng producer.

Kung iisipin mo nga naman, mukhang iyon ang sikreto kung bakit tumatagal din ang Regal, nakikita nila ang potentials ng mga baguhan na maaaring maging big stars pagdating ng araw. Ngayon kung titingnan mo, mahigit na kalahati ng bilang ng mga sikat na artista, nagsimula talaga sa Regal.

Kaya tama si Mother Lily Monteverde sa pagsasabing, “we do not only make quality movies, we also make big stars,” na mabilis naman niyang sinundan ng ”don’t quote me,” dahil baka nga naman sabihin nagyayabang siya pero totoo naman eh.

RnB MUSIC NI JAMES,
MAKALUSOT KAYA?

TALAGANG maliwanag na isinusugal ni James Reid ang kanyang career at popularidad sa gagawing concert, kasama si Nadine Lustre sa Araneta Coliseum sa February 9. Kay Nadine, wala namang mawawala eh. Ang pressure na kay James, kasi siya iyong sikat na singer eh, tapos ngayon ipinakikilala niya ang bagong type of music, na sinasabi niyang talagang musika niya.

Inamin din naman niya na sumikat ang mga nauna niyang album na naglalaman ng pop songs. Ngayon ang laman ng kanyang album at siya rin niyang kakantahin sa concert niya ay tipong RnB. Naroroon iyong risk na baka manibago ang kanyang fans, pero iyon nga ang dahilan kung bakit tinawag din nila ang concert na iyon na Revolution.