HATAW! D'yaryo ng Bayan hatawtabloid.com
PATAY ang isang 60-anyos empleyado ng Las Piñas City Hall makaraan pagsasaksakin ng vendor nang paalisin ang paninda dahil nakaaabala sa kalsada sa clearing ope-ration sa lungsod, kahapon ng umaga.
Hindi umabot nang buhay sa Las Piñas District Hospital ang biktimang si Benjamin Lopez y Dela Cruz, Jr., tinamaan ng mga saksak sa iba’t ibang bahagi ng kanyang katawan.
Habang arestado ang suspek na si Jenie Ermac Talisic, 30, fruit and vegetable vendor, residente sa Block 2, Lot 8, Apricot Street, Sihanoc Village, Brgy. Talon 4 ng lungsod.
Sa report kay Las Piñas City Police chief, Senior Supt. Marion Balong-long, nangyari ang insidente malapit sa Philippine Merchant Marine School (PMMS) sa Talon 4.
Ayon sa ulat, nagsasagawa ng clearing o-peration ang mga tauhan ng Traffic Anti-Vendor, kabilang ang biktima, sa kahabaan ng San Antonio Valley Road dahil sa nakahambalang na mga paninda ng mga vendor sa kalsada.
Pinaaalis ng biktima ang mga paninda ng suspek na humantong sa kanilang pagtatalo hanggang pagsasaksakin ni Talisic si Lopez.
(JAJA GARCIA)
