HATAW! D'yaryo ng Bayan hatawtabloid.com
HINDI lang bihasa kundi notoryus sa paggawa ng krimen ang mag-inang Yu Yuk Lai at Diana Yu Uy.
Mantakin ninyong hindi lang pala illegal drugs supplier si Yu Yuk Lai, kundi parang pilantropong nagbabayad ng P1-M monthly electric bill ng Correctional Institute for Women sa Mandaluyong city.
Mahusay magsuhol!
Habang ang kanyang anak naman ay parang napakabait na negosyante na nagdadala ng sako-sakong bigas sa Correctional pero shabu pala ang laman?!
Aba, baka ‘bigasang shabu’ ang diskarte ngayon ng mga drug lord?!
Habang naghahain ng arrest warrant sa tungki ng Malacañang ang PDEA na pinamumunuan ng mga tao nina Director Aaron Aquino at Deputy Director Ruel Lasala, mayroon na rin palang nagsasagawa ng operations sa Correctional.
Kumbaga, nagsalubong ang pag-aresto sa anak ni Yu Yuk Lai na si Diana habang mahigpit na nirekisa ang Correctional.
Kudos, PDEA chief DG Aaron Aquino and Deputy Director Lasala!
Iba talaga kayong magtrabaho!
Congratulations po!
Ilang impormante ang nagsabi na mayroon pang gumagalaw na mga tulak diyan sa nasabing area.
Hintay-hintay lang kayo, baka paggising ninyo isang umaga ay kasunod na kayo!
Hindi pa raw tapos ang imbestigasyon dahil may sinusudsod pang ‘ilang’ linta ang PDEA. Linta as in mabilis kumapit sa mga nasa kapangyarihan.
Go Gen. Aaron Aquino, Sir!
‘BLOGGERS’
SA PALASYO
DEMANDING?!
IBANG klase naman talaga ang bloggers sa Palasyo.
Hindi man lang sila nag-o-observe ng kortesiya. Oo nga’t binigyan sila ng go signal ng Palasyo na mai-cover ang Pangulo pero hindi iyon katumbas ng karapatan at kapangyarihan ng mainstream media.
Hindi ba naiisip ng Bloggers, nang papasukin sila sa Palasyo, ay mayroon nang umiiral na press corps doon?
Ngayon komo madali silang makalapit sa Pangulo e parang gusto pa nilang sagasaan ang karapatan ng mga tunay na mamamahayag.
Ang mabigat pa riyan, parang daig pa nila nag Pangulo sa pakikialam sa media outlets — print, broadcast, at lately sa social media.
Aba Bloggers, ingat-ingat po. Maging matalino sana kayo sa pagtupad ng inyong mga tungkulin nang sa gayon ay hindi kayo napupulaan.
‘Di ba Usec. Mocha Uson?!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
