17-anyos dalagita ginahasa ng FB friend

NAGA CITY – Arestado ang isang 20-anyos lalaki makaraan gahasain ang isang 17-anyos dalagita na nakilala niya sa Facebook sa Naga City.

Kinilala ang suspek na si Albert Ragay, 20, inaresto sa ikinasang entrapment operation ng National Bureau of Investigation-Naga sa isang motel sa lungsod.

Ayon sa 17-anyos biktima, nakilala niya ang suspek sa social networking site na Facebook nitong Setyembre.

“Mabait naman po siya noon. Tiwala po ako sa kanya dahil ‘yung pakikitungo niya maayos naman,” aniya.

Una umano silang nagkita noong 30 Setyembre, nang yayain siya ng suspek na manood ng basketball game. Nagpaalam siya sa ama na aalis.

Isinakay siya sa motorsiklo ni Ragay ngunit hindi siya sa basketball court dinala, kundi sa mismong bahay ng suspek.

Ayon sa biktima, anim beses siyang ginahasa. Dagdag niya, kinuhaan siya ni Ragay ng hubad na mga retrato.

Inihatid siya sa kanilang bahay dakong 5:00 ng madaling-araw.

Sinabi ng biktima, nais niyang matigil na ang namamagitan sa kanila ni Ragay, ngunit tinakot siyang ipadadala ang kanyang hubad na mga retrato sa kanyang inang nasa abroad, mga kapatid at kaibigan.

Giit ni Ragay, may relasyon sila ng biktima kahit may live-in partner siya at isang taong gulang na anak.

Samantala, nagbabala ang mga awtoridad sa paggamit ng social media.

“Sa mga kabataan, especially sa mga kababaihan, mag-ingat sa pagamit ng social media. Minsan doon nila nami-meet ‘yung strangers na ‘di naman talaga nila kilala, ‘di nila alam kung ano ang motibo sa kanila,” ayon kay Rizaldy Jaymalin, hepe ng NBI-Naga.

Ang suspek ay sasampahan ng kasong 7 counts ng rape, attempted rape, paglabag sa Anti-photo Voyeurism Act of 2009 at Cybercrime Law.