P.4M illegal pesticides kompiskado ng FDA-REU (Department store sinalakay)

TINATAYANG P400,000 halaga ng ipinagbabawal na household pesticides ang kinompiska ng mga operatiba ng Food and Drug Administration-Regulatory Enforcement Unit (FDA-REU) sa isang department store at ina-resto ang cashier nito sa Tondo, Maynila, kamakalawa ng gabi.

Pinangunahan ni FDA-REU Officer-In-Charge ret. General Allen Bantolo ang test-buy ope-ration dakong 3:45 pm at nang makabili ang poseur-buyer ay agad isinailalim sa product evaluation.

Nang makompirma ang ibinibentang ilegal na household pesticides ay agad ikinasa ang pagsalakay dakong 6:45 pm sa Novo department store sa panulukan ng Tayuman at A. Rivera Sts., Tondo, katuwang ang Criminal Investigation and Detection Group (CIDG) Anti-Fraud Division, mga tauhan ni Manila Police District (MPD) PS2 Supt. Santiago Pascual, sa pangunguna ni C/Insp. Gilbert Cruz.

Kinompiska ng raiding team ang mga produktong katulad ng Baoma mosquito coil, Read a Dream insecticide, at Butiki insecticide.

Habang inaresto ng mga awtoridad ang kahera ng department store na si Mary Grace Abucal.

Nahaharap sa kasong paglabag sa RA 9711 o “importing, distributing, selling and offering for sale of adulterated and unregistered household/urban hazardous substances” ang inarestong kahera na kasalukuyang nasa kustodiya ng CIDG. (BRIAN GEM BILASANO)