HATAW! D'yaryo ng Bayan hatawtabloid.com
PATAY ang isang 25-anyos construction worker makaraan saksakin ng katrabaho bunsod nang pag-aaway dahil sa plato sa Makati City, kahapon ng madaling-araw.
Kinilala ang biktimang si Kevin Lampitok, stay-in sa construction site ng commercial building sa Yakal St., San Antonio Village, ng lungsod, at residente sa San Jose Del Monte City, Bulacan.
Habang tinutugis ng mga awtoridad ang suspek na si Val Flores, isa ring construction worker.
Ayon sa salaysay ng testigong si Teddy Rebong, nakita ng suspek na ginagamit ng biktima ang kanyang plato na pinaglagyan ng pulu-tan dakong 1:00 am.
Tinanong ni Flores sa biktima kung saan ga-ling ang platong ginamit ngunit pabalang na sinagot ni Lampitok, noon ay lasing, na ninakaw niya ito.
Napikon si Flores sa sagot ng biktima hanggang magkaroon sila ng mainitang pagtatalo.
Nagpasyang umalis ang suspek para bumalik sa barracks ngunit sinundan siya ng biktima.
Lingid sa kaalaman ng biktima, armado ng patalim ang suspek na agad siyang inundayan ng saksak sa dibdib.
Tinangkang harangin ng mga guwardiya ang papatakas na suspek ngunit iwinasiwas ang patalim sa kanila.
Napag-alaman, dati nang may alitan ang da-lawa bago naganap ang insidente.
(JAJA GARCIA)
