DoJ nagpasaklolo sa Interpol vs Lascañas

INIUTOS ng Department of Justice (DoJ) sa National Bureau of Investigation (NBI), na makipag-coordinate sa International Police Organization (Interpol) para sa pag-aresto kay retired policeman Arturo Lascañas.

Inatasan ni Justice Secretary Vitaliano Aguirre II si NBI Director Dante Gierran noong 8 Hunyo, na humingi ng tulong sa Interpol kaugnay sa kinaroroonan ni Lascañas at makipag-coordinate sa proper authorities sa pag-aresto sa nasabing suspek.

Nauna rito, nagpalabas si Judge Retrina Fuentes ng Davao City Regional Trial Court Branch 10, ng warrant of arrest para kay Lascañas noong 5 Hunyo, kaugnay sa kasong frustrated murder at murder hinggil sa dalawang beses na pagtatangka sa buhay ng journalist na si Jun Pala noong Hunyo 2002 at Abril 2003, at pagpaslang sa nasabing mamamahayag noong 6 Setyembre 2003.

Ang mga kaso ay inihain ng Davao City Prosecutor’s Office noong 1 Hunyo, makaraan may makitang probable cause para kasuhan sa korte si Lascañas.

Si Lascañas, nagtungo sa Singapore noong 8 Abril, ay umamin na siya ang team leader ng sinasabing vigilante group na Davao Death Squad.

Para maaresto si Lascañas
PAGHINGI NG TULONG
NI AGUIRRE SA INTERPOL
KINONDENA NI TRILLANES

KINONDENA ni Senador Antonio Trillanes IV ang naging direktiba ni Department of Justice ( DoJ) Secretary Vitaliano Aguirre sa National Bureau of Investigation ( NBI), na makipag-coordinate sa Interpol para sa pag-aresto kay dating SPO3 Arturo Lascañas.

Ayon kay Trillanes, maliwanag na panggigipit ang ginagawa ni Aguirre sa mga testigo na nagpapahayag ng laban kay Pangulong Rodrigo Duterte.

Aniya, kitang-kitang ginigipit ng administrasyon ang dating testigong si Edgar Matobato, dating miyembro ng Davao Death Squad ( DDS), na siyang pumaslang sa mga sangkot sa illegal drugs sa Davao City.

Iginiit ni Trillanes, ang panggigipit kina Lascañas at Matobato ay patunay na nagsasabi ng totoo ang dalawa laban kay Pangulong Duterte.

(CYNTHIA MARTIN)