RWM gunman sangkot sa pagpaslang sa ex-pulis at abogado

MASUSING iniimbestigahan ng mga awtoridad ang posibleng pagkakaugnay ni Jessie Javier Carlos, ang gunman sa pag-atake sa Resorts World Manila, sa dalawang lalaking pinatay sa Paco, Maynila, nitong 1 Hunyo.

Sinabi ni National Capital Region Police Office (NCRPO) chief Director Oscar Albayalde, nakatanggap sila ng ulat na si Carlos at ang napaslang na sina Elmer Mitra, Jr., at Alvin Cruzin, ay kilala ang isa’t isa.

Ayon kay Albayalde, bineberipika nila ang  impormasyon na sina Carlos, Mitra at Cruzin ay nagkita bago ang gabi nang naganap ang pag-atake sa Resorts World, na nagresulta sa pagkamatay ng 38 katao.

“Malaki ang chances na before mangyari ang Resorts World Manila incident, ay magkakasama ‘yung tatlo,” pahayag ni Albayalde.

“Ang hinihintay na lang natin dito, ‘yung CCTV na ibibigay sa atin ng Resorts World, ‘yung the night before,” aniya.

Sinabi ng NCRPO chief, ang dalawang lalaki ay binaril sa loob ng isang sasakyan, na bumaliktad at bumangga sa gutter. Natagpuan silang patay makaraan ang insidente.

Aniya, narekober sa pinangyarihan ang insidente ang 9mm pistol.

Gayonman, hindi pa inilalabas ng pulisya ang resulta ng ballistic tests mula sa dalawang biktima.

Ayon kay Albayalde, ang gunman at si Cruzin ay magkakilala dahil ang huli ay dating police officer na naging casino fi-nancier. Habang si Mitra, aniya, ay isang abogado.

“Doon po sila nagsama… Marami tayong nakuhang information na talagang si Cruzin at Jessie ay magkasama sa negos-yo sa pagpi-finance sa casino,” aniya.