5 tiklo sa buy-bust

LIMA katao, kabilang ang isang menor-de-edad, ang arestado sa isinagawang buy-bust operation ng mga tauhan ng Northern Police District (NPD) sa Caloocan City, kahapon ng tanghali.

Kinilala ni NPD director, Chief Supt. Roberto Fajardo ang mga suspek na sina Allan Varga, 35, maintainer ng drug den; Leonardo Villegas, 33; Criselda Clarino, 34; Alfredo Santiago, 42, at isang 16-anyos out-of-school youth (OSY).

Batay sa ulat ni PO2 Jerome Pascual, dakong 11:30 am nang maaresto sa Morong St., Brgy. 30, Maypajo, ang mga suspek na sina Varga, Villegas, Clarino at Santiago habang nagbebenta ng shabu sa isang poseur buyer sa halagang P500.

Nabisto ng mga tauhan ng District Drug Enforcement Unit (DDEU) ang nasabing drug den sa Morong St., at naaktohan ang 16-anyos binatilyo habang gumagamit ng shabu. (ROMMEL SALES)