HATAW! D'yaryo ng Bayan hatawtabloid.com
SINIBAK ni Pangulong Rodrigo Duterte ang naiwang tauhan ni Sen. Francis “Kiko” Pangilinan sa Food Security Council dahil sa isyu ng katiwalian.
Pangalawa si Undersecretary Maia Chiara Halmen Valdez ng Office of the Cabinet Secretary at remnant ni Pangilinan sa Food Security Council, sa tinanggal ni Pangulong Duterte sa kanyang administrasyon sa nakalipas na dalawang araw.
Bago magsimula ang cabinet meeting sa Malacañang noong Lunes ng gabi, pinatalsik ni Duterte sa kanyang gabinete si Interior and Local Government Secretary Ismael ‘Mike’ Sueno.
Tatlo pa aniyang undersecretary ang sisibakin niya bago matapos ang linggo.
“May isa pa, may dalawa pang undersecretary. So bale at the end of the day, mamaya meron ng mga lima in a week,” anang Pangulo.
Ani Duterte, nainis siya sa pag-apela ni Valdez na baligtarin ang naunang desisyon na huwag magbigay ng importation permit sa hindi tinukoy na bansa o korporasyon.
“I was appalled, may isang undersecretary, ni-review niya lang ‘yung decision ni Jason Aquino na dinala ‘yung importation. Eh istorya-istorya na gustong magbigay. And it was appealed doon mismo sa Malacañan. So part of the Office of the President ‘yan. May isang undersecretary na babae, hold over ‘yan, pagusapan namin sa chopper kanina. Sabi ko, “Anong mukha ko na iharap sa mga farmers?” na why would we allow importation to compete with the local product? Hanggang ngayon, hindi ko mabasa anong ginawa nilang rason. Of course hindi natuloy kasi binara ko. Subsequently, sabi ko stop,” anang Pangulo sa Grand Harvest Festival ng She Leng Agritech Corporation sa Nmapmci Compound, Brgy. Tabacao, Talavera, Nueva Ecija.
Binigyan diin ng Pangulo, hindi siya magdadalawang isip na alisin sa puwesto ang sino mang opisyal ng gobyerno, kahit kaibigan pa niya, basta nasangkot sa usapin ng korupsiyon.
(ROSE NOVENARIO)
