Hitman sa Maynila utas sa enkwentro

PATAY ang isang hinihinalang ‘hitman’ ng sindikato ng ilegal na droga, sinasabing res-ponsable sa serye ng pagpatay, makaraan makipagbarilan sa mga tauhan ng MPD Station 7, sa Tondo, Maynila, kamakalawa ng gabi.

Agad binawian ng buhay ang suspek na si Arvin Aquino alyas Sundalo, at alyas Arbelboy Aquino, tinatayang 30-35-anyos, walang permanenteng tirahan.

Sa ulat ni PO3 Michael Maraggun ng MPD-Homcide Section, habang nagsasagawa ng anti-criminality operation ang grupo ng mga pulis, sa pangunguna nina Senior Inspectors Ness Vargas, at Jojo Salanguit, iniulat ng isang impormante na namataan ang suspek sa Old Antipolo St., sakop ng Brgy. 228.

Agad tinungo ng mga awtoridad ang nabanggit na lugar dakong 11:50 am kamakalawa, ngunit nakatunog ang suspek kaya nagtangkang tumakas.

Hinabol ng mga pulis ang suspek hanggang magkaroon ng palitan ng putok na nagresulta sa kanyang pagkamatay.

Ang suspek ay responsable sa pagpatay kay Hasan Husen alyas Boy Muslim noong 9 Agosto 2016.

Itinuro rin siyang suspek sa pagpatay kay  Carmelita Flores noong 30 Agosto  2016, at kay Annabel Bautista noong 5 Oktubre 2016, na ikinasugat ng isa pang biktima na si Raquel Manonog.

(LEONARD BASILIO)