4-anyos patay sa QC fire

PATAY ang isang 4-anyos totoy, makaraan maiwan sa isa sa apat na nasusunog na bahay, sa Brgy. Commonwealth, Quezon City kahapon.

Sa ulat ni Quezon City Fire Marshal, Sr. Supt. Manuel Manuel, ang biktima ay kinilalang si Angelo Sison, ng Kasoy St., Brgy. Commonwealth.

Ayon kay Manuel, dakong 3:25 pm, nang magsimula ang sunog sa ikalawang palapag ng bahay ni Leo Magtangob, sa 16-D Kasoy St. ng nasabing lugar.

Dahil gawa sa kahoy ang bahay ni Magtangob, mabilis itong tinupok ng apoy, gayondin ang apat katabing bahay, kabilang ang bahay ng pamilya Sison.

Inaalam ng mga awtoridad ang posibleng sanhi ng sunog, at kung paano naiwan ang paslit sa bahay, gayong nakalabas ang kanyang mga kaanak.

Naapula ang sunog dakong 3:50 pm, makaraan umabot sa ikalawang alarma.

Umaabot sa P40,000 halaga ng mga ari-arian ang naabo sa nasabing sunog.

(ALMAR DANGUILAN)