Kelot kalaboso sa binugbog na partner (Tinanong sa relasyon)

SWAK sa kulungan ang isang lalaki makaraan pagsusuntukin at tutukan ng patalim sa leeg ang kanyang live-in partner nang magalit makaraan kausapin ng biktima hinggil sa kanilang pagsasama, sa Malabon City kahapon.

Kinilala ang suspek na si Zedric Piquing, 21, ng 10 Alumiño St., Brgy. Tugatog ng nasabing lungsod.

Salaysay ng biktimang si Ma. Lourdes Pedida, 25, kina PO2 Ma. Theresa Dagman at PO1 Mayett Simeon, ng Women and Children’s Protection Desk, dakong 1:30 am, habang nakahiga sila sa kama, kinausap niya ang suspek kung ano ang plano kaugnay sa kanilang pagsasama.

Ikinagalit ito ng suspek at bigla siyang hinatak at sinuntok sa iba’t ibang bahagi ng katawan.

Pagkaraan, kumuha ng patalim ang suspek at tinutukan sa leeg ang biktima saka nagbantang gigilitan siya sa leeg.

Bunsod nito, humingi ng tulong ang biktima sa Malabon Police Community Precinct (PCP) na nagresulta sa pagkakadakip sa suspek. (ROMMEL SALES)