HATAW! D'yaryo ng Bayan hatawtabloid.com
PATAY ang isang barangay chairman na bagong halal na pangulo ng homeowners association, makaraan pasukin sa kanyang opisina at pagbabarilin ng apat hindi nakilalang mga suspek sa Caloocan City kamakalawa ng hapon.
Hindi na umabot nang buhay sa Our Lady of Lourdes Hospital si Onofre Delos Santos, 58, ng 714 General Luis St., Brgy. 166, Kaybiga, presidente ng Vista Verde Homeowners Association.
Sa ulat ni PO1 Divine Grace Rola, dakong 3:00 pm kasama ng biktima ang mga kaibigang sina Zaldy Fernandez, Manny Igliane at Marcelo Lao sa kanyang opisina sa Vista Verde nang dumating ang apat armadong kalalakihan na pawang nakasuot ng maskara at pinagbabaril si Delos Santos.
Pagkaraan, mabilis na tumakas ang mga suspek lulan ng motorsiklo tangay ang clutch bag ng biktima na naglalaman ng hindi pa nabatid na halaga ng koleksiyon mula sa mga kasapi ng homeowners assocation.
Sa nakapalap na impormasyon ng pulisya, sinasabing kabilang ang biktima sa listahan ng pulisya kaugnay sa hinihinalang protektor ng illegal drugs.
(ROMMEL SALES)
