2 patay, 8 sugatan sa ratrat ng tandem sa Bacolod

BACOLOD CITY – Dalawa ang patay habang walo ang sugatan sa dalawang magkasunod na insidente ng pamamaril ng riding-in-tandem sa Bacolod City kahapon ng madaling araw.

Pasado 12:00 am nang pagbabarilin sa Brgy. 28 ng dalawang lalaking magkaangkas sa motorsiklo ang mga empleyado ng isang sikat na kainan sa lungsod.

Agad binawian ng buhay sa insidente si Edwin Despi habang malubhang nasugatan si Ben Nabor.

Namatay rin sa insidente ang isang lalaking hindi pa nakikilala at hindi pa matukoy kung kaangkas din ng mga biktima sa kanilang motorsiklo.

Bukod sa kanila, sugatan din ang dalawang iba pa sa nasabing pamamaril.

Ilang minuto pa lamang ang nakalilipas, pinaulanan ng bala ng dalawang lalaking magkaangkas din sa motorsiklo ang lima katao na naglalaro ng cara y cruz sa gilid ng lansangan sa Purok Sigay, Brgy. 2.

Iniimbestigahan ng Bacolod City Police Office kung magkaugnay ang dalawang insidente dahil sa pagkakahawig ng estilo ng mga suspek.