HATAW! D'yaryo ng Bayan hatawtabloid.com
HINAMON ni Pangulong Rodrigo Duterte ang oposisyon na sampahan siya ng impeachment case kaysa mag-ingay .
“They can go ahead. Bakit pa mas maraming daldal? Sige na, impeach na… Hayaan mo sila. Sige impeachable, go ahead,” aniya kahapon.
Ang pahayag ng Pangulo ay reaksiyon sa sinabi ni Sen. Leila de Lima na puwedeng ma-impeach ang Punong Ehekutibo bunsod nang pagkampi sa mga pulis na sangkot sa pagpaslang kay Albuera, Leyte Ma-yor Rolando Espinosa Sr., dahil ito’y ‘betrayal of public trust.”
Ayon kay Chief Presidential Legal Counsel Salvador Panelo, hindi puwede ipa-impeach ang Pangulo kung pagbabatayan ang argumento ni De Lima na taliwas ang posisyon ni Duterte sa findings ng NBI na rubout ang nangyari kay Espinosa at hindi nanlaban gaya ng bersiyon ng mga pulis.
“Of course not. Why should it be an impeachable offense? It’s not even an offense,” ani Panelo.
Tungkulin aniya ng Presidente na tulungan ang kanyang mga tauhan na ipagtanggol ang kanilang mga sarili lalo na’t wala pang pormal na kasong isinampa laban sa kanila.
Ang korte aniya ang hahatol kung guilty ang mga pulis sa ibinibintang sa kanila.
“It doesn’t mean the NBI is correct because the court will have to decide whether they are correct or not. The presumption of innocence applies to all the accused in this case. Moreover, the presumption of regularity is not yet overcome so they have to file charges,” giit ni Panelo.
Tiniyak aniya ng Pangulo na maaaring magbago ang kanyang isip kapag nakapagharap nang mas matitibay na ebidensiya ang NBI laban sa mga pulis para patunayan na rubout ang pagpaslang kay Espinosa.
(ROSE NOVENARIO)
