Sa Lucena 1 patay, 2 sugatan sa karambola ng 3 sasakyan

NAGA CITY – Isang lalaki ang patay habang dalawa ang sugatan sa karambola ng tatlong sasakyan sa Diversion Road, Brgy. Domoit, Lucena City kamakalawa.

Kinilala ang namatay na si Regie Agunoy, 35-anyos, habang sugatan ang mga kasama niyang sina Renie Enteliso, 42, at Nikki Enteliso, 18.

Binabaybay ng isang van na minamaneho ni Enteliso ang kahabaan ng kalsada sa naturang lugar kasama ang dalawa pang biktima, nang mabangga ng pampasaherong bus na minamaneho n ng isang Rogelio Alegria, 49-anyos.

Dahil sa lakas ng pagkakabangga, nahagip ng naturang van ang unahang bahagi ng isang jitney na minamaneho ng nagngangalang si Elmario Sultan, 55-anyos.

Agad isinugod sa ospital ngunit idineklarang dead on arrival ng mga doktor si Agunoy.

Sa ngayon, nananatili sa kustodiya ng mga awtoridad ang driver ng bus habang inihahanda ang kasong isasampa laban sa kanya.